वैजापूर शहरातील 'या' बँका होत्या दरोडेखोरांच्या रडारवर...

वैजापूर

तीन दिवसांपूर्वी ४ नोव्हेंबर रोजी पकडलेल्या दोन दरोडेखोरांच्या मोबाईलमध्ये शहरातील भारतीय स्टेट बँक व वैजापूर मर्चेंट्स कॉ-ऑप बँकेचे छायाचित्र आढळून आले. यावरून या दोन बँका फोडण्याचे त्यांचे लक्ष्य होते. याशिवाय  शहरातील आयडीबीआय बँकेचे एटीएम  फोडणारेही याच दरोडेखोरांच्या गावातील आहे. हेही समोर आले असून पोलिसांनी त्याला दुजोरा दिला आहे. दरम्यान अन्य तीन फरार न दरोडेखोरांचा पोलिस कसून शोध घेत आहेत.

दरोडा टाकण्याच्या उद्देशाने आलेल्या परप्रांतीय दरोडेखोरांचा सिनेस्टाईलने पाठलाग करीत वैजापूर पोलिसांनी दोघांच्या मुसक्या आवळल्या. ४ नोव्हेंबर रोजी - रात्रीच्या सुमारास पोलिसांनी ही कारवाई केली होती. दरम्यान या दरोडेखोरांच्या रडारवर शहरातील भारतीय स्टेट बँकेसह वैजापूर मर्चेंट्स कॉ-ऑप बँक असल्याचे समोर आले आहे. या दोन्हीही बँकाची छायाचित्र दरोडेखोरांच्या मोबाईलमध्ये आढळून आल्याने बैंकिग क्षेत्रात खळबळ उडाली आहे. ४ नोव्हेंबर रोजी रात्रीच्या सुमारास पोलिस दरोडेखोरांचा थरार शहरवासीयांना पहावयास मिळाला. ठाणेप्रमुख सत्यजित ताईतवाले यांच्या पथकाने शिताफीने या टोळीतील मोहमंद कैफ नजमोद्दीन (रा.उलेटा ता. फिरोजपूर जि. नुहु राज्य हरियाणा) आझाद इमरु खान (रा. झारोकशी ता. पुनहना जि. नुहु राज्य हरियाणा) या दोघांना जेरबंद करून त्यांच्याकडून पोलिसांनी दरोड्‌यासाठी वापरण्यात येणारे साहित्य, कार व रोकड असा एकूण चार लाख ८७ हजारांचा मुद्देमाल जप्त केला होता. अन्य त्यांचे तिघे साथीदार फरार झाले होते. परंतु सायबर शाखेमार्फत तांत्रिक विश्लेषणाआधारे त्यांचा शोध सुरू आहे. त्यांचा लवकर तपास लागेल, असा विश्वास पोलिसांनी व्यक्त केला आहे. स्टेशन रस्ता, जरुळ फाटा, जीवनगंगा हाउसिंग सोसायटी, आघूर रस्ता व तिडी अशी ही धुमश्चक्री सुरू होती. शेवटी तिडी परिसरात पोलिसांनी झडप घालून दोघांच्या मुसक्या आवळल्या होत्या.

एटीएम फोडणारे आरोपींच्याच गावातील...

दरम्यान शहरातील स्टेशन रस्त्यावरील आयडीबीआय बँकेचे एटीएम दोनदा फोडून चोरट्यांनी लाखो रुपयांची रक्कम लंपास केली. १६ जानेवारी २०२४ रोजी चोरट्यांनी १६ लाख रुपयांवर डल्ला मारला. याच दिवशी कन्नड तालुक्यातील चापानेरमधीलही एटीएम फोडून २२ लाख लांबविले, या दोन घटनेतील अंतर साधारणतः दोन तासांचे असावे. जून २०२४ मध्ये पुन्हा शहरातील आयडीबीआय बँकेचे एटीएम दुसऱ्यांदा फोडून ११ लाख लांबविले. या घटनेला जवळपास दीड वर्षांपेक्षा जास्त कालावधी उलटून गेला. परंतु चोरटे पोलिसांच्या हाती लागले नाही. परंतु असे असले तरी या घटनेतील चोरटे हे आता पकडलेल्या दरोडेखोरांच्याच गावातील असल्याची पुष्टी पोलिसांनी केली आहे. त्यामुळे एटीएम फोडे याच गावातील असल्याचे सिद्ध तर झालेच. दरोडेखोरांची नजर भारतीय स्टेट बैंक व वैजापूर मर्चट्स कॉ-ऑप बँकेवर असल्याचे दिसून येते.