वैजापूर पोलिसांनी पकडला ६३ लाखांचा गुटखा

एकाविरुद्ध गुन्हा दाखल

वैजापूर

राज्यात बंदी असलेला गुटखा अमरावतीहुन-मुंबईकडे 

वाहतूक करणाऱ्या आयशर टेम्पो चालकावर वैजापूर पोलिसांनी २० ऑगस्ट रोजी कारवाई करून ६३ लाख रुपयांचा गुटखा जप्त केला. याप्रकरणी श्रीमन छोटेलाल प्रसाद (गोंड) (गाव पकडी, पोस्ट फेफाणा, ता.जि. बलिया राज्य उत्तर प्रदेश) याच्याविरुद्ध वैजापूर पोलिस ठाण्यात गुन्हा दाखल करण्यात आला.

जप्त केलेल्या गुटख्यासह पोलिस निरीक्षक सत्यजित ताईत वाले व इतर

याबाबत पोलिसांनी दिलेल्या माहितीनुसार,  पोलिस निरीक्षक सत्यजीत ताईतवाले यांना खबऱ्यामार्फत माहिती मिळाली की, गंगापूरकडून- वैजापूरमार्गे- कोपरगावकडे आयशरने (क्रमांक एमएच ०४ एलई ३९५९) महाराष्ट्र शासनानेप्रतिबंधीत केलेला गुटखा भरून अवैधरित्या विक्री करण्याच्या उद्देशाने येत आहे. या माहितीच्या आधारे पोलिस निरीक्षक सत्यजीत ताईतवाले यांचेसह त्यांचे पथकाने वैजापूर ते कोपरगाव जाणारे रोडलगत असलेल्या कादरी मोटर गॅरेज समोर बुधवारी सकाळी माहितीतील आयशर वाहन अडविले. पथकाने वाहनाची तपासणी केली असता वाहनात महाराष्ट्र शासनाने प्रतिबंधीत केलेला वेगवेगळ्या कंपनीचा ६३ लाख रुपयांचा गुटखा पोलिसांना मिळून आला. यावेळी पोलिसांनी चालकाला त्याचे नाव गाव विचारले असता त्याने त्याचे नाव श्रीमन छोटेलाल प्रसाद (गोंड) (गाव पकडी, पोस्ट फेफाणा, ता.जि. बलिया राज्य उत्तर प्रदेश) असे असल्याचे सांगत हा गुटखा आपण अमरावतीहून- मुंबईकडे नेत असल्याचे सांगितले. लगेचच पथकाने ६३ लाखांचा गुटखा व २० लाख रुपयांचे वाहन असा एकूण ८३ लाखांचा मुद्देमाल जप्त केला. याप्रकरणी अन्न सुरक्षा अधिकारी प्रज्ञा सुरासे यांनी दिलेल्या फिर्यादीवरून वैजापूर पोलिस ठाण्यात गुन्हा दाखल करण्यात आला. सदरची कामगीरी  पोलीस अधीक्षक डॉ. विनयकुमार  राठोड, अप्पर पोलीस अधीक्ष अन्नपूर्णा सिंह, उपविभागीय पोलिस अधिकारी भागवत फुंदे यांचे मार्गदर्शनाखाली पोलीस निरीक्षक सत्यजित ताईतवाले, पोउपनि युवराज पाडळे, पोउपनि आर. आर. जाधव, पोलिस हवालदार अमोल राजळे, योगेश झाल्टे,  कुलदिप नरवडे, प्रशांत गिते, अजित नाचन, सचिन रत्नपारखे यांच्या पथकाने केली.