वैजापूरात आदर्श आचारसंहिता लागू...

वैजापूर 

राज्य निवडणूक आयोगाने आज (ता.०४) रोजी आदर्श आचारसंहिता लागू करताच शहराचे वातावरण बदलले आहे. शहरातील मुख्य चौक, शासकीय इमारती आणि संस्थांवरील बॅनर, पोस्टर तसेच भिंतींवरील राजकीय संदेश हटवले जात आहेत. याचा परिणाम मुख्यालयापासून गल्लीबोळांपर्यंत स्पष्टपणे दिसून येत आहे. शहराच्या विविध भागांमध्ये नगरपरिषद कर्मचारी मोहीम राबवून प्रचार साहित्य हटवत आहेत. दरम्यान, इच्छुक उमेदवारांनी आपापला तोंडी प्रचार सुरू केला आहे.प्रभाग रचना आणि प्रारूप मतदार यादी कार्यक्रमापूर्वीच इच्छुक नगरसेवकांनी आपली निवडणुकीची चर्चा सुरू केली होती. अनेकांनी दररोज विशेष प्रसंगी पोस्टर लावणे, तर काहींनी धार्मिक आणि सामाजिक बॅनरची उधळण करणे सुरू केले होते. त्यामुळे शहरातील भिंती नेत्यांच्या चेहऱ्यांच्या पोस्टरने गच्च भरल्या होत्या. प्रशासनाने स्पष्ट संदेश दिला आहे की आचारसंहितेचे काटेकोर पालन केले जाईल. कोणत्याही राजकीय पक्षाने किंवा उमेदवाराने नियमांचे उल्लंघन केल्यास तत्काळ कायदेशीर कारवाई करण्यात येईल.

राज्य निवडणूक आयोगाचे आदेश प्राप्त होताच मंगळवारपासूनच बॅनर, पोस्टर आणि होर्डिंग्ज हटवण्याची विशेष मोहीम सुरू करण्यात आली आहे. तसेच नगरपरिषद हद्दीतील सर्व उद्घाटन, भूमिपूजन, लोकार्पण आदी कार्यक्रम रद्द करण्यात आले आहेत.

बी.यु.भागवत

(सहायक निवडणूक निर्णयधिकारी तथा मुख्याधिकारी, वैजापूर नगरपरिषद)