बिरोळा शिवारात आढळले बिबट्याचे पिल्लू : वनविभागाच्या कुंभकर्ण झोपेमुळे ग्रामस्थ हतबल...

 

शिऊर 

नितीन साळुंके

वैजापूर तालुक्यातील बिरोळा येथे शेतीकामासाठी शेतात गेलेल्या शेतकऱ्यास बिबट्याचे पिल्लू आढळून आले. या घटनेमुळे परिसरात बिबट्याचा वावर असल्याबाबत पुन्हा एकदा पुष्टी मिळाली असून ग्रामस्थांत घबराटीचे वातावरण पसरले आहे.

याबाबत अधिक माहिती अशी की, मंगेश शिरसाट यांची वैजापूर तालुक्यातील बिरोळा  गावाजवळ शेत गट क्रमांक ७८ मध्ये शेतजमीन आहे. याठिकाणी त्यांची वस्ती असून जनावरांचा गोठा देखील आहे. दरम्यान शनिवारी दुपारी नेहमीप्रमाणे ते जनावरांना चारापाणी करण्यासाठी त्याठिकाणी गेले. नेमके याचवेळी गोठ्यापासून थोड्याच अंतरावर त्यांना अचानक बिबट्या दिसला. यामुळे त्यांची भंबेरी उडाली व त्यांनी आरडाओरड सुरू केला. मात्र यामुळे बिबट्याने शेजारीच असलेल्या कपाशीच्या शेतात शिरकाव केला.  त्यानंतर मात्र मंगेश यांनी बिबट्याच्या पावलांचा मागोवा घेतला. यादरम्यान त्यांना एका ठिकाणी बिबट्याचे पिल्लु आढळले. त्यांनी क्षणाचाही विलंब न करता तात्काळ वन विभागाशी संपर्क साधला. मात्र तब्बल पाच तासानंतर वन विभागाचे कर्मचारी घटनास्थळी दाखल झाले. मात्र त्याने बिबट्याचे पिल्लु आहे त्या जागेवर सोडून ते निघून गेले. कर्मचाऱ्यांच्या या भेटी दरम्यान  शेतकऱ्यांनी त्यांच्याकडे तात्काळ त्या जागेवर पिंजरा लावण्याची मागणी केली. मात्र तसे न करता उलट 'या पिलाचे काही कमी-जास्त झाल्यास आम्ही संबंधित शेतकऱ्याची सर्व्हिसिंग (कारवाई) करु' अशी तंबी देऊन ते तिथून निघून गेले.

घटनांची मालिकाच मात्र वनविभाग कुंभकर्ण झोपेत....

आजच्या या घटनेपूर्वी देखील परिसरातील जिरी, बिरोळा, वळण कविटखेडा या परिसरात नागरिकांवर बिबट्याने प्राणघातक हल्ला केल्याच्या अनेक घटना घडल्या आहेत. हा परिसर भटाणा मध्यम प्रकल्पाच्या भोवतालचा असल्याने या परिसरात बागायती पिके घेतली जातात. बिबट्यांना मका पिकाची 'लपण' सोयीस्कर असल्याने या भागात नेहमीच बिबट्याचा वावर असतो. याबाबत वारंवार वनविभागाला माहिती देऊनही वनविभाग अॅक्शन मोडवर येत नसल्यामुळे परिसरातील शेतकऱ्यांत दहशतीचे वातावरण असून त्यांना रोज जीव मुठीत धरून वावरे लागत आहे.