आमदार बोरनारेंची एका धार्मिक कार्यक्रमात इंट्री : अन् कट्ट्यावरच्या गप्पांना उधाण..

कट्ट्यावरच्या गप्पा - प्रभाग क्रमांक -२...

वैजापूर

वैजापूर नगरपालिकेच्या निवडणूक - २०२५ साठी उमेदवारी अर्ज दाखल करण्याची आजपासून लगबग सुरू झाली असून राजकीय नेतेमंडळीनी देखील बहुतेक प्रभागात मतदारांच्या भेटीगाठीवर भर देण्यास सुरुवात केली आहे. मग यासाठी एखाद्या प्रभागात आयोजित धार्मिक कार्यक्रम असो अथवा इतर कुठलाही  सोहळा नेते व कार्यकर्ते यामध्ये आवर्जून हजेरी लावत आहेत. यापार्श्वभूमीवर दोन दिवसांपूर्वी शहरातील प्रभाग क्रमांक -२ मध्ये आमदार रमेश बोरनारे यांनी मर्चंट कॉलनी परिसरात एका धार्मिक कार्यक्रमात दिलेल्या भेटी दरम्यान कट्ट्यावरच्या राजकीय गप्पांना उधाण आले आहे.

त्याचे झाले असे की, वैजापूर शहरातील मर्चंट कॉलनी येथे ०८ नोव्हेंबर रोजी संकष्टी चतुर्थी निमित्त त्याच परिसरातील एका 'मित्रमंडळाच्या' 'वजनदार' पदाधिकाऱ्यांने महाप्रसादाचा कार्यक्रम आयोजित केला होता. या कार्यक्रमासाठी आमदार रमेश बोरनारे, माजी नगराध्यक्ष डॉ. दिनेश परदेशी यांच्यासह मर्चंट कॉ-ऑप बँकेचे माजी चेअरमन विशाल संचेती आणि इतरही पक्षाचे कार्यकर्ते व प्रभागातील (क्रमांक-२) मधील जवळपास ८०० च्या जवळपास नागरिकांनी हजेरी लावली. दरम्यान कार्यक्रमाच्या मध्यात आमदार रमेश बोरनारे, त्यांचे बंधु संजय बोरनारे, रणजीत चव्हाण, अँड नानासाहेब जगताप यांची 'इंट्री' झाली. याठिकाणी आमदार बोरनारे यांनी जवळपास एकतास वेळ देत कार्यक्रमाच्या 'वजनदार' आयोजकाचा सत्कार करून त्यांच्यासोबत दिलखुलास  गप्पा केल्या. मात्र या सर्व घटनाक्रमादरम्यान उपस्थितीत इतर पक्षाच्या कार्यकर्त्यांमध्ये 'चलबिचल' सुरू झाली. प्रभाग क्रमांक-२ मध्ये मर्चंट कॉ-ऑप बँकेचे माजी चेअरमन विशाल संचेती हे भारतीय जनता पक्षाकडून तर शिवसेनेकडून संदीप बोर्डे यांच्यात लढत होण्याचे चित्र आहे. दरम्यान विशाल संचेती यांच्यासाठी ही लढत प्रतिष्ठेची मानली जात आहे. मात्र या कार्यक्रमाचे आयोजक असलेल्या 'त्या' मंडळाच्या 'वजनदार' पदाधिकाऱ्याचा व आमदार बोरनारे यांच्यात झालेला संवाद इतर राजकीय पक्षाच्या कार्यकर्त्यांमध्ये 'चलबिचल' करणारा ठरला. 

संचेती विरुद्ध बोर्डे...

मर्चंट बँकेचे माजी चेअरमन विशाल संचेती हे देखील पालिकेत पहिल्यांदा 'इंट्री' करण्यासाठी याच प्रभागातून निवडणूक आखाड्यात उतरणार असल्याची चर्चा आहे. दरम्यान वैजापूर नगरपालिकेसाठीच्या - २०१८ च्या निवडणुकीत संदीप बोर्डे यांच्या सहचरणी यांनी प्रभाग क्रमांक - ३ मधून नगरसेवक पदासाठी निवडणूक लढवली होती. या निवडणुकीत त्यांचा मात्र ६३ मतांनी पराभव झाला होता. या पराभवाबाबत बोर्डे यांनी परिक्षण करून ते पुन्हा यंदाच्या निवडणुकीत प्रभाग क्रमांक - २ मधून स्वतःचे नशीब अजमविणार असल्याची माहिती आहे. यापार्श्वभूमीवर ०८ नोव्हेंबर रोजीच्या 'त्या' धार्मिक कार्यक्रमाचे 'वजनदार'आयोजक आपल्या समर्थकांसह कुणाच्या समर्थनार्थ मैदानात उतरतात ? हे बघणे औत्सुक्याचे ठरणार आहे.