शेतातील वादातून मारहाण : चौघांना सश्रम कारावास..

 

वैजापूर 

तालुक्यातील जांबरगाव येथे किरकोळ वादातून  पिता-पुत्रास जबर मारहाण करणाऱ्या चौघांना एक वर्ष सश्रम कारावास व प्रत्येकी दोन हजार रुपये दंडाची शिक्षा येथील  प्रथम वर्ग न्याय दंडाधिकारी एस. के. खान (मॅडम) यांनी सुनावली. पारसनाथ रोठे, नितीन रोठे, सागर रोठे व ताराबाई रोठे (सर्व रा. जांबरगाव, ता. वैजापूर) असे शिक्षा सुनविण्यात आलेल्या आरोपींची नावे आहेत.

याबाबत अधिक माहिती अशी की, घटनेतील फिर्यादी सतीश व त्यांचे वडील अंबादास रोठे सन २४ जुलै २०२१ रोजी सायंकाळच्या सुमारास  शेतीकाम करत होते. नेमके याचवेळी शेजारील पारसनाथ रामराव रोठे व  त्यांचे मुले नितीन,सागर व पत्नी ताराबाई हे  कुटुंबिय सामाईक बांधावर मुरूम टाकत होते. त्यावेळी अंबादास रोठे यांनी "जमीन मोजून घ्या व नंतर मुरूम टाका" असे त्यांना सांगितले. यावरून त्यांनी अंबादास व सतीश यांना शिवीगाळ केली. याशिवाय नितीन याने अंबादास  यांचे फावड्याने डोके फोडले.  याशिवाय सागर  व ताराबाई यांनी देखील दगड मारून मुक्का  मार दिला. याशिवाय  पारसनाथ  याने लोखंडी दत्ताळीने अंबादास  यांना मारहाण करून जीवे मारण्याची धमकी दिली. या प्रकरणी सतीश  रोठे यांनी दिलेल्या फिर्यादीवरून  वैजापूर पोलीस ठाण्यात गुन्हा दाखल करण्यात आला. पोलिसांनी गुन्ह्याचा तपास करून आरोपीविरुद्ध न्यायालयात दोषारोपपत्र दाखल केले. सरकार पक्षाच्यावतीने अँड  संजय बारसे यांनी सहा साक्षीदारांच्या साक्षींवर आधारित बाजू मांडली. यामध्ये प्रत्यक्षदर्शी साक्षीदार, वैद्यकीय अधिकारी यांच्या साक्षी महत्वाच्या ठरल्या. त्यानुसार प्रथम वर्ग न्याय दंडाधिकारी एस. के.खान (मॅडम) यांनी आरोपी पारसनाथ रोठे, नितीन रोठे, सागर रोठे व ताराबाई रोठे (सर्व रा. जांबरगाव, ता. वैजापूर) यांना कलम ३२३ व ३२४ भा.दं.वि. अंतर्गत दोषी ठरवत एक वर्ष सश्रम कारावास व प्रत्येकी दोन हजार रुपये दंडाची शिक्षा ठोठावली.