धनादेश अनादरण प्रकरणी आरोपीस कारावास व १ लाख वीस हजार रुपये दंड

वैजापूर

व्यवसायासाठी रकमेची गरज असल्याचे सांगून आरोपीने हात उसने म्हणून घेतलेल्या ७० हजार रुपयांच्या परतफेडीसाठी दिलेला धनादेश अनादरीत झाल्याप्रकरणी आरोपीस एक महिना कारावास, १ लाख वीस हजार रुपये दंड व दंडाची रक्कम न दिल्यास अतिरिक्त करावासाची शिक्षा प्रथम वर्ग न्यायदंडाधिकारी  एम.ए.बेंद्रे (मॅडम) यांनी सुनावली.

याबाबत अधिक माहिती अशी की, वैजापूर येथील व्यापारी दर्शन विजयसी रामैय्या यांचे आरोपी कुणाल सुभाष जगताप  (रा. सुंदर गणपती गल्ली, वैजापूर) याचेसोबत मित्रत्वाचे संबंध होते. व्यवसायासाठी रकमेची गरज असल्याचे सांगून आरोपी कुणाल जगताप याने फिर्यादी दर्शन रामैया यांच्याकडे ७० हजार रुपयांची मागणी केली व सदरील रक्कम तीन महिन्यांत परत करण्याची हमी दिली. त्यामुळे दर्शन यांनी कुणाल यास ११ नोव्हेंबर २०११ रोजी हातउसने म्हणून ७० हजार रुपये दिले होते. दरम्यान तीन महिने झाले तरी आरोपीने घेतलेली रक्कम परत न केल्यामुळे फिर्यादीने आरोपीकडे सदर रकमेची वारंवार मागणी केली.  शेवट आरोपीने ०५ मार्च २०१३ चा 'दि वैजापूर मर्चंट्स को-ऑप. बँक लि. शाखा वैजापूरचा ७० हजार रुपयांचा धनादेश दिला. परंतु धनादेश न वटता अनादरित होऊन परत आला. त्यानंतर फिर्यादिने ॲड. एस. एस. ठोळे यांचेमार्फत आरोपीस नोटीस पाठवून अनादरीत झालेल्या धनादेशाची रक्कम आणून देण्यास सांगितले होते. परंतु आरोपीने मुदतीत रक्कम आणून न दिल्यामुळे फिर्यादीने आरोपीविरुद्ध वैजापूर येथील न्यायालयात ॲड. एस. एस. ठोळे यांचेमार्फत चलनक्षम दस्तऐवज कायद्याचे कलम १३८ नुसार फिर्याद दाखल केली होती. न्यायालयाने उपरोक्त प्रकरणातील फिर्याद, सबळ साक्षीपुरावा व मुद्देसूद युक्तिवाद लक्षात घेऊन आरोपी कुणाल जगताप यास वरिलप्रमाणे शिक्षा सुनावली. प्रकरणात फिर्यादीतर्फे ॲड. एस. एस. ठोळे व ॲड. आकाश ठोळे यांनी काम पाहिले.