डॉ. परदेशींना बहुमताने विजयी करा : भाजप प्रदेशाध्यक्ष रविंद्र चव्हाण...

वैजापूर

केंद्रात, राज्यात व स्थानिक स्वराज्य संस्थामध्ये एक विचाराचे सरकार असल्यास केंद्र व राज्य सरकारला कुठलेही धोरण ठरविणे सोपे जाते. यामुळे भाजप व राष्ट्रवादी काँग्रेस पक्षाचे नगराध्यक्ष पदाचे युतीचे उमेदवार डॉ.दिनेश परदेशी यांना बहुमताने निवडूण द्या असे आवाहन भारतीय जनता पक्षाचे प्रदेशाध्यक्ष रविंद्र चव्हाण यांनी वैजापूर येथे आयोजित प्रचार सभेत बोलताना केले. 

भाजप व राष्ट्रवादी काँग्रेस पक्षाचे युतीचे नगराध्यक्ष पदाचे उमेदवार डॉ. दिनेश परदेशी यांच्यासह युतीच्या नगरसेवक पदाच्या उमेदवारांच्या प्रचारार्थ २७ नोव्हेंबर रोजी येथील पंचायत समिती कार्यालयासमोर एका सभेचे आयोजन करण्यात आले होते यावेळी ते बोलत होते. या सभेला राज्याचे गृहनिर्माण व बहुजन कल्याण मंत्री अतुल सावे, माजी केंद्रीय अर्थ राज्यमंत्री डॉ.भागवत कराड,  जिल्हाध्यक्ष संजय खंबायते, नगराध्यक्ष पदाचे उमेदवार डॉ.दिनेश परदेशी, माजी नगराध्यक्ष बाळासाहेब संचेती, शिल्पा परदेशी, हाजी अकिल शेख, विशाल संचेती यांची व्यासपीठावर प्रमुख उपस्थिती होती.  यापुढे बोलताना चव्हाण म्हणाले की, केंद्रात एनडीएचे तर राज्यात महायुतीचे सरकार आहे. हे सरकार सामान्यांच्या हिताचे विचार करून निर्णय घेते असे सांगत केंद्र व राज्य सरकारने राबविलेल्या विविध योजनांची यावेळी त्यांनी माहिती दिली. दरम्यान वैजापूरात भाजप व राष्ट्रवादी काँग्रेस पक्षाची झालेली युती ही वैजापूरकरांच्या हक्कासाठी झालेली युती आहे. वैजापूर शहराचे वाढते नागरिकीकरण बघता शहराला नक्की जे हवंय ते आम्ही वैजापूरकरांना उपलब्ध करून देऊ. यासाठी मुख्यमंत्री देवेंद्र फडणवीस हे डॉ. दिनेश परदेशी यांच्या पाठीशी खंबीरपणे उभे आहेत. दरम्यान कोण येऊन काय आश्वासन देऊन गेलं याकडे दुर्लक्ष करा. कुणाच्या सांगण्याने कोणताही प्रकल्प अथवा योजना थांबणार नाहीत. 'हर घर जल' या अभियानातंर्गत प्रत्येक घरात स्वच्छ पाणी पोहचविण्याचे देशाचे पंतप्रधान नरेंद्र मोदी यांनी ढरविले असून यासाठी राज्य सरकार व केंद्र सरकार कटिबद्ध आहेत.  देशात,राज्यात व स्थानिक पातळीवर एक विचारांचे सरकार आल्यास गतिमान प्रशासन होण्यासाठी मदत होते. जाती-धर्म या सर्वाच्या पलीकडे जाऊन देशातील नागरिकांना शासनाच्या सर्व योजनांचा लाभ देण्याची भूमिका सरकारची आहे. या निवडणुका कुणालाही मोठे करण्यासाठी नसून नागरिकांचे जीवन सुरक्षित  समृद्ध करण्यासाठी व भावी पिढीचे भविष्य घडविण्यासाठीची आहे असे म्हणत डॉ. परदेशी यांच्यासह युतीच्या नगरसेवक पदाच्या सर्व उमेदवाराना साथ द्या असे त्यांनी यावेळी आवाहन केले. या सभेला भाजप व राष्ट्रवादी काँग्रेस पक्षाचे नगरसेवक पदाच्या उमेदवारासह पक्ष पदाधिकऱ्यांची उपस्थिती होती.

अन् सर्व योजनांची मंजुरी कॅबिनेट देते...

राज्याचे गृहनिर्माण व बहुजन कल्याण मंत्री 

अतुल सावे यांनी त्यांच्या भाषणा दरम्यान बोलतांना 

सांगितले की, सर्व योजनांची मंजुरी ही कॅबिनेटमध्ये होते व त्याबाबत शेवट मंजुरी हे मुख्यमंत्री देतात. वैजापूर शहराच्या विकासासाठी कुठलाही निधी कमी पडू देणार नाही. शहराच्या विकासासाठी हवा तितका निधी आम्ही देऊ असे त्यांनी सांगितले.

१८२ कोटींचा प्रस्ताव दाखल...

शहराला नियमित पाणी पुरवठा व्हावा यासाठी शासन दरबारी दोन पर्यांयासह १८२ कोटीं रुपयांचा प्रस्ताव दाखल केला असल्याचे सांगत डॉ. दिनेश परदेशी यांनी  शहरातील गरजू लोकांना पंतप्रधान आवास योजनेतंर्गत ७०० तर रमाई घरकुल योजनेतंर्गत १ हजार घरे उपलब्ध करून दिल्याचे त्यांच्या भाषणात बोलतांना सांगितले. याशिवाय शहराची सततची होणारी वाहतूककोंडीच्या अनुषंगाने रिंग रोड व्हावा अशी मागणी देखील डॉ. परदेशी यांनी प्रदेशाध्यक्ष रविंद्र चव्हाण यांच्याकडे केली. मागील पाच वर्षांच्या काळात शहराच्या विकासासाठी आम्ही २०० कोटींचा निधी उपलब्ध करून घेतला अशी माहिती देखील डॉ. परदेशी यांनी त्यांच्या भाषणात बोलताना दिली.