वैजापूर पालिका निवडणूक : नातलगांच्या लढती ठरणार लक्षवेधी....

वैजापूर

पालिका निवडणुकीचे 'रणसंग्राम' सुरू झाले असून प्रचारासाठी मोजक्या काही दिवसांचा कालावधी मिळणार आहे. यामुळे आता निवडणूक रिंगणातील उमेदवारांसाठी 'करा किंवा मरा' अशीच परिस्थिती आहे. शहरातील बहुतांश प्रभागात काका-पुतणे, मावसभाऊ, आत्या-भाची, सगेसोयरे अशा लढतींबरोरच बाप-बेटा, जावा-जावा, पती-पत्नीही निवडणूक रिंगणात राहून आपले नशीब आजमावत आहेत. विशेषतः नातलगांच्या लढतींनी शहरवासीयांचे लक्ष वेधले आहे.

पालिका निवडणुकीची रणधुमाळी सुरू झाली आहे. या पार्श्वभूमीवर कॉर्नर सभा, बैठका सुरू झाल्या आहेत. नगराध्यक्ष पदासाठी भाजपचे डॉ. दिनेश परदेशींसह शिवसेनेचे संजय बोरनारे व कॉग्रेस आघाडीचे सुभाष गायकवाड निवडणूक आखाड्यात उतरले आहेत. या पदासाठी जोरदार रस्सीखेच सुरू आहे. शहरातील काही प्रभागांमधील नातलगांच्या लढती रंगतदार होण्याची शक्यता आहे. प्रभाग क्रमांक १ अ मध्ये मसिरा शेख -सुमैय्या शेख या अनुक्रमे भाजप-शिवसेनेच्या आत्या-भाचीमध्ये लढत होत आहे. प्रभाग क्रमांक ३ ब मध्ये राष्ट्रवादी काँग्रेसचे रियाज शेख व शिवसेनेचे मिरान शेख या काका-पुतण्याच्या लढतीकडे अख्ख्या शहराचे लक्ष वेधले आहे. ही लढत तुल्यबळ मानली जात आहे. हा प्रभाग म्हणजे दोघांचेही 'होमपीच' आहे. त्यामळे कुणाची सरशी होणार? याबाबत चर्चा झडू लागल्या आहेत. यात काका म्हणजेच रियाज शेख हे माजी नगरसेवक असून ते राजकारणात चांगलेच मुरलेले आहे तर दुसरीकडे पुतण्या मिरान शेख नवखा असला तरी तो चांगली लढत देऊ शकतो. अशीही चर्चा आहे. प्रभाग क्रमांक १० ब मध्ये शिवसेनेचे हमीद कुरेशी व राष्ट्रवादी काँग्रेसचे अकिल कुरेशी या मावसभावांचा सामना होत आहे. ही लढतही रंगतदार ठरण्याची शक्यता आहे. शिवसेनेकडून डॉ. विजया डोंगरे व ज्योती डोंगरे या सख्ख्या जावा आमनेसामने नसल्या तरी वेगवेगळ्या प्रभागातून निवडणूक आखाड्यात उतरल्या आहेत. शिवसेनेचे साबेरखान व ताहेरखान (सुलतान) हे बाप-बेटे, भाजपकडून प्रकाश चव्हाण - चित्रा चव्हाण हे पती-पत्नी वेगवेगळ्या प्रभागातून निवडणूक लढवित आहेत. प्रभाग क्रमांक ११  मधून भाजपचे दशरथ बनकर व राष्ट्रवादी काँग्रेसचे (अजित पवार) पुंडलिक गायकवाड या 'सोयऱ्यांची' मैत्रीपूर्ण लढत होणार आहे. निवडणुकीत भाजप-राष्ट्रवादी काँग्रेस (अजित पवार) युती असली तरी येथे दोन्ही पक्षांनी स्वतंत्र उमेदवार देऊन मैत्रीपूर्ण लढतीचा निर्णय घेतला आहे. प्रभाग क्रमांक ७ ब मध्ये शिवसेनेच्या ललिता साळुंके व भाजपच्या सविता चव्हाण या नातलग आमनेसामने उभे ठाकल्या आहेत.