बनावट विमा काढून रक्कम हडप करणाऱ्या 'त्या' दलालाविरुद्ध गुन्हा दाखल...

वैजापूर

बनावट विमा काढून रक्कम हडप करणाऱ्या दलालाविरुध्द (एजंट) वैजापूर पोलिस ठाण्यात गुन्हा दाखल करण्यात आला आहे. उपप्रादेशिक परिवहन अधिकारी कार्यालयाने तपासणी करून या एजंटाचा प्रताप उघडकीस आणला.

पारस पाटणी (रा. छत्रपती संभाजीनगर) असे गुन्हा दाखल करण्यात आलेल्या दलालाचे नाव आहे. याबाबत पोलिसांनी दिलेल्या माहितीनुसार, वैजापूर येथील उपप्रादेशिक परिवहन कार्यालयात १७ नोव्हेंबर रोजी कार्यालयातील दैनंदिन कामकाजा दरम्यान कर्मचाऱ्यांनी ट्रॅक्टर ट्रेलर संवर्गातील नवीन ९ ट्रेलर वाहनांच्या नोंदणीकरीता कागदपत्रे सादर केली असता या कागदपत्रांमध्ये जोडलेल्या विमा पॉलिसी या खोट्या असल्याचा संशय आला. यामध्ये असलेली वाहने अनुक्रमे सागर साहेबराव सामसे, बाबूराव कारभारी बोराडे, विष्णू छगन प्रधान, योगेश रावसाहेब गायके, विठठल राधाकिसन नरोडे, अरूण रायभान डुकरे, आण्णासाहेब भाऊराव साखरे, भारती तात्याराव बरसे, राहूल पोपटराव कुलकर्णी या ट्रॅक्टर ट्रॉली खरेदारांची असून या ट्रॅक्टर ट्रॉली राधेशाम इंजिनिअरींग वर्क्स, देवगांव रंगारी, ता. कन्नड, जि. छ. संभाजीनगर, शिवराज ट्रेलर, कासोद ता. सिल्लोड जि. छ. संभाजीनगर, जय भवानी ट्रेलर, मु. पो. अंबेलोहाळ, ता. 'गंगापूर, जि. छ. संभाजीनगर यांच्यामार्फत बनविण्यात आलेले आहेत. तसेच नवीन वाहनांच्या चेसीस क्रमाकांना द न्यू इंडिया इन्शुरन्स कंपनी लिमिटेड नावाने जारी केलेली विमा पॉलिसी असलेले प्रमाणपत्रे नवीन वाहन नोंदणीसाठीच्या कागदपत्रात जोडलेली आहेत. न्यू इंडिया इन्शुरन्स कंपनी लिमिटेडच्या नाशिक येथील मुख्य व्यवसाय प्रबंधक कार्यालयातून सदर पॉलिसी जारी केल्याच्या प्राथमिक कागदपत्रांवरून दिसून आले. सदर विमा पॉलिसी या बोगस व बनावटी असल्याचा संशय उपप्रादेशिक परिवहन अधिकारी गणेश विघ्ने यांना संशय आल्याने या पॉलिसीच्या सत्यता प्रमाणित करण्यासाठी इन्शुरन्स कंपनीच्या मुख्य व्यवसाय प्रबंधक कार्यालयाशी मेलव्दारे पत्रव्यवहार केला असता सदर विमा पॉलिसी या संबंधित कंपनीने जारी केल्या नसल्याचे उघडकीस येऊन सदर पॉलिसी बनावटी असल्याचे कळवले. दरम्यान वैजापूर येथील उपप्रादेशिक परिवहन कार्यालयात ट्रॅक्टर ट्रॉली नोंदणीकरीता खोटे व बनावटी कागदपत्रे सादर करून शासनाची फसवणूक केल्याप्रकरणी उपप्रादेशिक परिवहन अधिकारी गणेश विघ्ने यांनी दिलेल्या फिर्यादीवरून पारस पाटणी (रा. छत्रपती संभाजीनगर) याच्याविरुद्ध वैजापूर पोलिस ठाण्यात गुन्हा दाखल करण्यात आला आहे.