१० हजारांची लाच स्वीकारणारा ला.लु.प्र. पथकाच्या जाळयात....

वैजापूर

तालुक्यातील शिऊर पोलिस ठाण्यात दाखल तक्रार अर्जाप्रकरणी 'पोलिस अंमलदाराकडून काम करून घेईल' असे सांगून १० हजार रुपये लाच स्विकारणाऱ्या एकास छञपती संभाजीनगर येथील लाचलुचपत प्रतिबंधक विभागाच्या पथकाने रंगेहात पकडल्याची कारवाई १९ नोव्हेंबर रोजी केली. नवनाथ मच्छिन्द्र कोकाटे (धंदा- शेती रा. पिंपळगाव (खंडाळा) ता.वैजापूर) असे ही लाच घेणाऱ्याचे नाव आहे.

याबाबत अधिक माहिती अशी की, घटनेतील तक्रारदार यांच्या वडिलांना मारहाण झाली होती.  त्यांना अटॅक येऊन ते मयत झाले होते. दरम्यान त्यांचे मृत्यू संदर्भात शिऊर पोलीस ठाण्यात घटनेतील तक्रार यांनी अर्ज दिला होता. तसेच अर्जदार यांना सदर तक्रार अर्जातील गैरअर्जदार यांनी फोनद्वारे शिवीगाळ करून ऍट्रासिटीचा गुन्हा दाखल करण्याची धमकी दिली होती. त्या अनुषंगाने तक्रारदार यांनी दिनांक ११ नोव्हेंबर रोजी शिऊर पोलीस ठाण्यात येथे तक्रार अर्ज दाखल केला होता. सदर दोन्ही तक्रार अर्जामध्ये तक्रारदार यांच्या बाजूने अर्ज चौकशी करून मदत करून देण्यासाठी खासगी इसम नवनाथ कोकाटे यांनी तक्रारदार यांना '२० हजार रुपये द्यावे लागतील तेव्हा ते बिट अंमलदार यांचेकडून काम करून घेईल' असे बोलून २० हजार रुपये लाचेची मागणी केली होती. परंतु तक्रारदार यांना लाच देण्याची इच्छा  नसल्याने त्यांनी छञपती संभाजीनगर येथील ला.प्र.वि. तक्रार नोंदवली. या तक्रारीच्या अनुषंगाने १९ नोव्हेंबर रोजी पथकाने तालुक्यातील शिऊर येथे जाऊन पंचासमक्ष लाच मागणी पडताळणी कार्यवाही केली असता खासगी इसम यांनी तक्रारदार यांनी दिलेल्या अर्जा सबंधीत मदत करून देण्यासाठी लोकसेवकाच्या नावाचा प्रभाव पाडून स्वतःकरिता २० हजार रुपये लाचेची मागणी करून स्वीकारण्याचे मान्य केले. शिवाय मागणी केलेल्या लाच रकमेपैकी १० हजार रुपये लाचेची रक्कम पंच साक्षीदारा समक्ष स्वीकारली व स्वीकारल्यानंतर पंचा समक्ष त्यास सापळा पथकाने  ताब्यात घेतले. सदरची कारवाई छञपती संभाजीनगर येथील लाचलुचपत प्रतिबंधक विभागाच्या पोलिस अधीक्षक माधुरी कांगणे, अप्पर पोलिस अधीक्षक शशिकांत सिंगारे, पोलिस उपधीक्षक राजीव तळेकर यांच्या मार्गदर्शनाखाली पोलिस निरीक्षक योगेश शिंदे, पोनि संतोष तिगोटे, पोनि योगेश शिंदे , पोलिस हवालदार शिनकर, अंमलदार प्रकाश डोंगरदिवे, रामेश्वर ताठे यांच्या पथकाने पार पाडली.

भ्रष्टाचारा संबंधित नागरिकांची काही तक्रार असल्यास...

या कारवाई नंतर छञपती संभाजीनगर येथील लाचलुचपत प्रतिबंधक विभागाच्यावतीने सर्व नागरिकांना आवाहन करण्यात आले आहे की, त्यांचेकडे कोणत्याही शासकीय अधिकारी कर्मचारी किंवा त्यांच्या वतीने खासगी इसम कोणतेही शासकीय काम करून देण्यासाठी कायदेशीर फी व्यतिरिक्त अन्य लाचेची मागणी करीत असल्यास तात्काळ लाचलुचपत प्रतिबंधक विभागाच्या टोल फ्री क्रमांक १०६४,

व्हॉट्सॲप क्रमांक - ७७२०८९१०६४

९०११०९२७७७ या क्रमांकांवर संपर्क साधावा.