काय म्हणता ? वैजापूरात १८३ मोटारसायकली ब्लॅकलिस्ट....

कार्यक्षेत्रात वाहन विक्री न केल्याने केली कारवाई...

वैजापूर

शहरातील उपप्रादेशिक परिवहन अधिकारी कार्यालयाच्या पथकाने शहरातील स्टेशन रस्त्यावरील जगदंबा हिरो दुचाकी वाहन विक्रेत्यावर धडाकेबाज कारवाई केली आहे. या ठिकाणी छत्रपती संभाजीनगर येथील धनलक्ष्मी ऑटो मोबाईल या विक्रेत्याकडून आलेली वाहने विक्री केल्याचे पथकाच्या निदर्शनास आले. या कारवाईत तब्बल १८३ दुचाकी ब्लॅक लिस्ट करून ७ लाख ३२ रुपयांचा दंड ठोठावला आहे. याशिवाय अन्य दोन वाहन विक्रेत्यांवरही पथकाने कारवाई केली आहे. तेथे १४ वाहने अनधिकृतपणे विक्री करताना आढळून आली. 

ठरवून दिलेल्या कार्यक्षेत्रात वाहन विक्री न करणाऱ्या तीन वाहन विक्रेत्यांवर येथील उपप्रादेशिक परिवहन अधिकारी कार्यालयाच्या पथकाने धडाकेबाज करून विक्रेत्यांना लाखों रुपयांचा दंड ठोठावला आहे. या वाहन विक्रेत्यांचा परवाना एका ठिकाणचा अन् विक्री भलतीकडेच करताना आढळून आले. शहरातील स्टेशन रस्त्यावरील जगदंबा हिरो वाहन विक्रेते अधिकृत विक्रेते असतानाही ते छत्रपती संभाजीनगरच्या वाळुज येथील धनलक्ष्मी आॅटो वाहन घेऊन ग्राहकांना विक्री करताना आढळून आले. वास्तविक पाहता ग्राहकांना जगदंबा हिरो विक्रेत्याच्या नावाने देयके ग्राहकांना देणे अपेक्षित असताना धनलक्ष्मी आॅटो विक्रेत्याच्या नावाने देण्यात आल्याचे आढळून आले. याशिवाय २४ वाहने विनापासिंग व १६ वाहने शोरूममध्ये अशी एकूण ४० वाहने अनधिकृत आढळून आली. जून ते आतापर्यंत एकूण १८३ दुचाकी विक्री करण्यात आल्याचे पथकास निदर्शनास आले. ही वाहने ब्लॅक लिस्ट करण्यात आली असून यापोटी ७ लाख ३२ हजार रुपयांचा दंड ठोठावला आहे. याशिवाय धनलक्ष्मी आॅटो विक्रेत्याच्या वाहन विक्री परवान्याचा निलंबन प्रस्ताव पाठविण्यात येणार आहे. विक्री केलेल्या वाहनांचा दंड विक्रेत्याने भरल्यानंतरच ही वाहने ब्लॅक लिस्टमधून काढण्यात येतील. असे पथकाने स्पष्ट केले. 

अशोक ऑटोटेकवर दुसऱ्यांदा कारवाई

दरम्यान सिल्लोड येथील वाहन विक्रेत्यावर आरटीओंनी पुन्हा कारवाई केली आहे. अशोक ऑटोटेक इंडिया प्रायव्हेट लिमिटेड हा बजाज ऑटो या दुचाकी कंपनीचा वाहन वितरक तालुक्यातील महालगाव येथे वाहने विक्री करताना आढळून आला.छत्रपती संभाजीनगर येथील वाहन विक्रेते पगारिया मोटर्सवरही शहरात अनधिकृतपणे वाहने विक्री करीत असल्याने कारवाई करण्यात आली आहे.

अशोक ऑटोटेक या अनधिकृत वाहन विक्रेत्याच्या उत्सव ऑटोवर एकूण तेरा अनधिकृत वाहने व पगारिया या मोटर्सवर एका अनधिकृत वाहनावर असा एकूण ८४ हजार रुपयांचा दंड आकारला आहे. वाहन कंपन्यांनी वाहने विक्री करण्यासाठी विशिष्ट ठिकाणी परवानगी दिलेली असताना देखील जिल्ह्यातील मोठे वाहन विक्रेते मोटर वाहन कायद्यातील तरतुदींचं उल्लंघन करून वाहन विक्री करीत असल्याचे समोर आले आहे. वैजापूरचे उपप्रादेशिक परिवहन अधिकारी गणेश विघ्ने, सहायक मोटर वाहन निरीक्षक राजश्री सोळके, संदीप येडे, विक्रम राजपूत, प्रवीण काकडे, संतोष मांजरे यांच्या पथकाने ही कारवाई केली. 

आतापर्यंत चार विक्रेत्यांवर कारवाई 

शुक्रवारी वैजापूर उप प्रादेशिक परिवहन कार्यालय मार्फत अनधिकृत वाहन विक्रेत्यांवर कारवाई केल्याची भणक लागताच जिल्ह्यातील बहुतांश अनधिकृत वाहन विक्रेत्यांनी शोरूम बंद ठेवले आहे. शुक्रवारपासून मंगळवारपर्यंत उपप्रादेशिक परिवहन अधिकारी कार्यालयाकडून चार विक्रेत्यांवर कारवाई करण्यात आली. 

 

अशोक ऑटोटेकसह व पगारिया मारूती सुझीकी व धनलक्ष्मी ऑटो मोबाईल या तिन्हीही वाहन वितरकांवर निलंबनाची कारवाई सुरू असून त्यांच्यावर दंडात्मक कारवाई करून‌ वाहने ब्लॅकलिस्ट केली आहेत. धनलक्ष्मी ऑटो मोबाईल विक्रेता वैजापूरच्या जगदंबा हिरो विक्रेत्यामार्फत वाहने विक्री करताना आढळून आला.

- गणेश विघ्ने, प्रभारी उप प्रादेशिक परिवहन अधिकारी,  वैजापूर