वैजापूरात रुग्ण सेवेच्या नावाखाली 'आनंदी आनंद गडे'..

रुग्णांची लूट करणाऱ्या दवाखान्याविरुद्ध आमदार बोरनारेंचा एल्गार !!

वैजापूर

जनसेवेच्या नावाखाली शासनाची फसवणूक करून रुग्णांची लूट करणाऱ्या रुग्णालयांविरुद्ध आमदार रमेश बोरनारे यांनी एल्गार पुकारला असून रुग्णांची लूट करणाऱ्या अशा दवाखान्याचा लवकरच आपण भांडाफोड करणार असल्याचे आमदार बोरनारे यांनी सोशल मीडियावर झपाट्याने व्हायरल होत असलेल्या एका व्हिडिओत म्हटले आहे. हा व्हिडीओ व्हायरल होताच समाज माध्यमावर नागरिकांतून 'आनंदी आनंद गडे' च्या भावना उमटून नागरिकांनी आपल्या भावनांना वाट मोकळी करून दिली.

 या व्हिडिओत बोलताना आमदार रमेश बोरनारे म्हणाले की, 'शस्त्रक्रिया एकाची अन बेडवर तीन रुग्ण अॅ डमिट करून सर्वांचे आधारकार्ड घेऊन अप्रूव्हल (मान्यता) घेतली जाते.' रुग्णसेवेच्या नावाखाली वैजापुरात काही डाॅक्टर लूट करीत आहेत. अशा दवाखान्याचा भांडाफोड करण्याची वेळ आली असल्याचे आमदार बोरनारे यांनी सांगितले. दरम्यान आमदार महोदयांचा इशारा नेमका कोणत्या हाॅस्पिटलकडे आहे. हे मात्र झाकून राहिले नाही. आमदार रमेश बोरनारे सोशल मीडियावर मनमोकळेपणाने व्यक्त झाले. यावेळी त्यांनी शहरातील एका दवाखान्यात सुरू असलेल्या 'गोरखधंद्या'चा पर्दाफाश केला. सामान्य नागरिक डाॅक्टरला देव मानतात. परंतु हेच डाॅक्टर 'देवा' ऐवजी 'कसाई' होऊन  रुग्णांसह शासनाला कसे लुटतात? आणि भरमसाठ पैसा कमवून कसा 'आनंद'  घेतात? याचा पाढाच बोरनारेंनी वाचून दाखविला.

 या व्हिडिओत बोलताना बोरनारे म्हणाले की, १०४ दवाखान्यांची यादी माझ्याकडे आलेली आहे आणि ती मी बघितली. त्यात शहरातील एका दवाखान्यातील गंभीर प्रकार माझ्या निदर्शनास आला. जेव्हा हा विषय मला मांडायचा तेव्हा मी भांडाफोड करीलच. असे ठणकावून सांगत, शस्त्रक्रिया एकाची करायची अन त्याच्या समवेत दोन डमी (बनावट) रुग्ण दाखवून त्यांची आधारकार्ड घेतली जातात. त्यानंतर अप्रूव्हल घेऊन शस्त्रक्रिया केल्याचे दाखविले जाते. किती मोठी फसवणूक आहे ही. असं सांगत जेव्हा लेखापरीक्षण होईल तेव्हा मी 'त्या' रुग्णालयांना सोडणार तर नाहीच. पण कुणीतरी भांडाफोड करणे गरजेचे आहे. त्यामुळे त्याची हिंमत होणार नाही. बोरनारे हे एवढ्यावरच न थांबता पुढे म्हणाले की, मला प्रत्यक्षात काही रुग्ण येऊन भेटले आणि त्यांनी हा 'गोरखधंदा' उघड केला. यावर माझं एकच म्हणणं आहे की, 'त्या' रुग्णालयात जाऊन विचारलं पाहिजे की, तुमच्यावर कोणती शस्त्रक्रिया केली गेली. तेव्हाच 'दूध का दूध और पाणी का पाणी' होईल. असेही ते म्हणाले. विशेष म्हणजे बोरनारेंनी 'त्या' दवाखान्याचे नाव जरी बोलण्यातून उघड केले नसले तरी तो 'लुटारू दवाखाना' शहरातीलच आहे. असे ठामपणे सांगून वेळ आल्यानंतर या 'धंद्या'चा पर्दाफाश केल्याशिवाय आपण राहणार नाही. असे आत्मविश्वासाने त्यांनी सांगितले. 

मला नाही अब्रू मी कशाला घाबरू...

शहरातील  'त्या' दवाखान्यात शासकीय योजनेच्या माध्यमातून अनेकांची लूट तर झालीच. परंतु शासनाचीही लूट करून धुळफेक केली. असंही बोरनारे म्हणाले. दरम्यान गेल्या कित्येक दिवसांपासून 'त्या' दवाखान्यात 'अंधेरनगरी चौपट राजा' कारभार सुरू आहे. परंतु तक्रार द्यायला कुणी धजावत नसल्याने या दवाखान्याचा कारभार म्हणजे 'मला नाही अब्रू मी कशाला घाबरु' अशा पद्धतीने सुरू आहे.