धनादेश अनादर प्रकरणी एकास दहा महिने सश्रम कारावास

एक लाख ३० हजार रुपये नुकसाभरपाई देण्याचे न्यायालयाचे आदेश

वैजापूर

शहरातील वैजापूर नागरी सहकारी पतसंस्थेकडून कर्जाऊ रकमेच्या परताव्यासाठी दिलेला धनादेश न वटता अनादरीत होऊन परत आल्याने एकास दहा महिने सश्रम कारावास तसेच  एक लाख ३० हजार रुपये नुकसाभरपाई फिर्यादी पतसंस्थेस देण्याची व ही रक्कम न दिल्यास अतिरिक्त ३ महिने साध्या कारावासाची शिक्षा प्रथम वर्ग न्यायदंडाधिकारी (२) एस. के. खान (मॅडम) यांनी १२ सप्टेंबर रोजी सुनावली.

याबाबत अधिक माहिती अशी की, येथील वैजापूर नागरी सहकारी पतसंस्थेकडून नारायण वाणी  (रा. वैजापूर) याने कर्ज घेतले होते. कर्जाऊ घेतलेल्या रकमेची ठरल्याप्रमाणे परतफेड न केल्यामुळे पतसंस्थेने त्याच्याकडे सदर रकमेची मागणी केली. त्यामुळे नारायण वाणी याने  वैजापूर नागरी सहकारी पतसंस्थेच्या नावाने १३ जानेवारी २०२२ रोजीचा एक लाख ६ हजार ७२९ रुपयांचा धनादेश दिला. सदरचा धनादेश पतसंस्थेने बँकेत  वटविण्यासाठी टाकला. परंतु पुरेशा रकमेअभावी  धनादेश न वटता अनादरित होऊन परत आला. दरम्यान नारायण वाणी याने धनदेशाची रक्कम मुदतीत जमा केली नाही. त्यामुळे पतसंस्थेने येथील न्यायालयात धाव घेऊन ॲड. मजहर करीम बेग यांचेमार्फत चलनक्षम दस्तऐवज कायद्याचे कलम १३८ नुसार फिर्याद दाखल केली होती. न्यायालयाने उपरोक्त प्रकरणातील फिर्याद, साक्षीपुरावे पतसंस्थेचे वकील ॲड. मजहर करीम बेग यांनी केलेल्या प्रभावी युक्तिवादाच्या आधारावर न्यायालयाने आरोपीस दहा महिने कारावास व एक लाख ३० हजार रुपये पतसंस्थेस देण्याची शिक्षा ठोठावली. सदरील प्रकरणात फिर्यादी वैजापूर नागरी सहकारी पतसंस्था वैजापूर यांच्यावतीने ॲड. मजहर करीम बेग यांनी कामकाज पाहिले.