"स्वच्छ व सुंदर बस स्थानक" अंतर्गत वैजापूर बसस्थानकाची तपासणी

अमरावती येथील पथकाने केली पाहणी

वैजापूर 

स्वच्छ व सुंदर बसस्थानक सर्वेक्षण -२०२५अंतर्गत वैजापूर बस स्थानकाची शुक्रवार(ता.०८) रोजी अमरावती  प्रादेशिक  राज्य मार्ग परिवहन विभागाचे प्रादेशिक व्यवस्थापक रोहन पलंगे( नियंत्रण--५ ) व  वरिष्ठ सांख्यिकी अधिकारी राकेश पवार यांच्या पथकाने पाहणी केली.

शहरातील जेष्ठ समाजसेवक व स्वच्छतादूत धोंडीरामसिंह राजपूत व प्रवासी मित्र हरीश कुमावत यांच्या समवेत बस स्थानक स्वच्छता, ओला -सुका कचरा विलगीकरण, येथील शौचालय स्वच्छता, प्रवासी आसन व्यवस्था, डस्ट बिन व्यवस्था, बसेस वेळापत्रक या सर्व बाबींची तपासणी केली. या तपासणी दरम्यान समिती सदस्य धोंडीरामसिंह  राजपूत व हरीश कुमावत यांच्याकडून शंभर गुणांची अभिप्राय प्रश्नावली भरून घेतली. बस स्थानक व्यवस्था व स्वच्छता तसेच एकंदरीत  व्यवस्थेबाबत रोहन पलंगे यांनी समाधान व्यक्त केले. दरम्यान दोन वर्षांपूर्वी वैजापूर बस आगराला व स्थानकाला लाख रुपयांचे पारितोषिक मिळाले होते.

या वर्षी ही कोटीचे बक्षीस ठेवण्यात आलेले आहे. वृक्षारोपण व पार्किंग व्यवस्था करण्याच्या सूचना तपासणी समिती यांनी आगर प्रमुख किरण धनवटे यांना दिल्या. यावेळी किरण धनवटे व स्थानक नियंत्रक कृष्णा जाधव यांनी संबंधितांना सविस्तर माहिती सादर केली. याप्रसंगी सहाय्यक वाहतूक अधिकारी एस. के.गरुड, गोपाल पगारे, जनार्दन कोकाटे,कीर्ती जाधव,सचिन राऊत, आदिनाथ मुळे, सागर सुरासे यांची उपस्थिती होती.