Social News : आषाढी एकादशीच्या पार्श्वभूमीवर प्रशासनाचे नागरिकांना आवाहन

'भगर' खाताना घ्यावयाची काळजी

वैजापूर

आषाढी एकादशीच्या उपवासाला मोठ्या प्रमाणात भगरीचे सेवन केले जाते. भगर खाल्ल्यामुळे अन्न विषबाधा झाल्याच्या अनेक घटना राज्यातील विविध ठिकाणी यापूर्वी घडल्या आहेत.भगरीवर मोठ्या प्रमाणात अस्परजिलस (Aspergillus) प्रजातीच्या बुरशीचा प्रादुर्भाव होतो. ज्यामुळे फ्युमिगाक्लेविन (Fumigaclavine) यासारखी विषद्रव्ये (Toxins) तयार होतात. पावसाळ्यातील वातावरण बूरशीच्या वाढीसाठी अनूकूल असते. अशी बूरशीचा प्रादुर्भाव झालेली भगर खाण्यात आल्यास अन्न विषबाधा होऊ शकते. त्यामुळे भगर खाताना काळजी घेण्याची आवाहन छत्रपती संभाजीनगर येथील जिल्हा आपत्ती व्यवस्थापन प्राधिकरणाचे निवासी उपजिल्हाधिकारी प्रवीण फुलारी यांनी ०४ जुलै रोजी केले असून पुढीलप्रमाणे सूचना निर्गमित केल्या आहेत.

भगर खाताना घ्यावी काळजी....

बाजारातून भगर आणल्यानंतर ती निवडून स्वच्छ करा. शक्यतो पाकीटबंद भगर घ्या. बँड नाव नसलेली किंवा लेबल नसलेली भगर पाकीटे व सूटी भगर घेऊ नका. भगर घेतांना पाकीटावरचा पॅकींग दिनांक व अंतिम वापर दिनांक तपासा, भगर साठवताना ती स्वच्छ कोरड्या ठिकाणी, व्यवस्थित झाकणबंद डब्यात ठेवा, जेणेकरुन वातावरणातील ओलाव्यामुळे बुरशीची वाढ होणार नाही. जास्त दिवस भगर साठवू नका. तथापि, जास्त दिवस साठवलेली भगर खाऊ नका. याशिवाय शक्यतो भगरीचे पीठ विकत आणू नये. भगरीच्या पिठामध्ये वातावरणातील ओलावा शोषून घेण्याची क्षमता अधिक असते. त्यामुळे पिठाला बूरशीची लागण होण्याची शक्यता जास्त असते. भगरीच्या दशम्या किंवा भाकरी खाण्याऐवजी खिचडी खावी. भगरीचे पीठ आवश्यक असेल तेवढेच दळून घ्या. जास्त दिवस पीठ साठवू नका. बाहेरुन दळून आणण्यापेक्षा घरीच दळावे. भगर आणि शेंगदाणे हे अधिक प्रथिनेयुक्त पदार्थ आहेत. दोन ते तीन दिवस सलग उपवास असताना या पदार्थांचे सेवन अॅसिडीटी वाढण्यास कारणीभूत ठरते. त्यामुळे उलटी, मळमळ व पोटाचे त्रास होतात. या पदार्थांचे सेवन पचनशक्तीनुसार मर्यादीतच करावे.

याशिवाय प्रशासनाने भगर विक्रेत्यांसाठी देखील पुढीलप्रमाणे सूचना दिल्या आहेत.

विक्रेत्यांनी पॅकबंद भगरचीच विक्री करावी. तथापि, भगर खरेदी करतांना घाऊक विक्रेत्याकडून पावती घ्यावी, भगरीचे पॅकेट अथवा पोत्यावर उत्पादकांचा पत्ता, परवाना क्र., पॅकींग दिनांक, अंतिम वापर दिनांक असल्याची खात्री करून घ्यावी, मुदतबाह्य भगर किंवा भगर पिठाची विक्री करु नये, सुटी भगर व खूले भगर पिठ शक्यतो विक्रीसाठी ठेऊ नये. अन्न व औषध प्रशासनाचे वतीने भगरविक्री करणाऱ्या दुकानांची तपासणी करण्यात येत असून नियमांचे उल्लंघन करणाऱ्या विक्रेत्यांवर अन्न सुरक्षा व मानके अधिनियम २००६ अंतर्गत कारवाई करण्यात येईल असा इशारा छत्रपती संभाजीनगर येथील जिल्हा आपत्ती व्यवस्थापन प्राधिकरणाचे निवासी उपजिल्हाधिकारी प्रवीण फुलारी  यांनी दिला आहे.