वैजापूर येथील न्यायालयाचा निकाल
वैजापूर
येथील वैजापूर नागरी सहकारी पतसंस्थेकडून कर्जाऊ घेतलेल्या रकमेच्या परताव्यासाठी दिलेला धनादेश न वटता अनादरीत होऊन परत आल्या प्रकरणी एका आरोपीस मुख्य न्यायदंडाधिकारी (३) दिवाणी न्यायाधीश वरिष्ठस्तर डी. एस. पिसाळ यांनी ७० हजार रुपये नुकसाभरपाई पतसंस्थेस देण्याचे आदेश दिलेत. दरम्यान ही रक्कम न भरल्यास आरोपीस अतिरिक्त एक महिना साध्या कारावासाची शिक्षा सुनावली.
याबाबत अधिक माहिती अशी की, शहरातील वैजापूर नागरी सहकारी पतसंस्थेकडून आरोपी लताबाई नंदू जेजुरकर (रा. किनगाव ता. फुलंब्री) यांनी कर्ज घेतले होते. दरम्यान कर्जाऊ घेतलेल्या रकमेची ठरल्याप्रमाणे परतफेड न केल्यामुळे पतसंस्थेने आरोपीकडे सदरील रकमेची मागणी केली. त्यावेळी आरोपीने पतसंस्थेला ०२ फेब्रुवारी २०२१ रोजीचा ७० हजार ३३५ रुपयांचा धनादेश दिला. परंतु पुरेशा रकमेअभावी धनादेश न वटता अनादरित होऊन परत आला. यामुळे पतसंस्थेने आरोपीस नोटीस देऊन रक्कम जमा करण्यास सांगितले होते. परंतु नोटीस मिळूनही आरोपीने धनदेशाची रक्कम मुदतीत जमा केली नाही. त्यामुळे फिर्यादीने (पतसंस्था) आरोपीविरुद्ध वैजापूर येथील न्यायालयात धाव घेऊन ॲड. मजहर करीम बेग यांचेमार्फत चलनक्षम दस्तऐवज कायद्याचे कलम १३८ नुसार फिर्याद दाखल केली. न्यायालयाने उपरोक्त प्रकरणातील फिर्याद, साक्षीपुरावा व ॲड. मजहर करीम बेग यांनी केलेल्या युक्तिवादाच्या आधारावर आरोपीस वरीलप्रमाणे शिक्षा ठोठावली. प्रकरणात फिर्यादी पतसंस्थेच्यावतीने ॲड. मजहर बेग यांनी कामकाज पाहिले.
Social Plugin