शिवराई येथील जिल्हा परिषद शाळेला 'इन्स्पायर मानक अवॉर्ड'

 

'विटा उचलण्याचे सुरक्षित साधन' मॉडेलची राज्यस्तरावर निवड; दोन जिल्ह्यातून एकमेव जिल्हा परिषद शाळा म्हणून गौरव

वैजापूर

विज्ञान आणि नवोपक्रमाच्या क्षेत्रात तालुक्यातील शिवराई येथील जिल्हा परिषद शाळेने ऐतिहासिक यश संपादन केले आहे. छत्रपती संभाजीनगर येथे नुकत्याच पार पडलेल्या इन्स्पायर मानक अवॉर्ड-२०२३-२४ व २०२४-२५ च्या जिल्हास्तरीय विज्ञान प्रदर्शनात सादर केलेल्या प्रशालेच्या "विटा उचलण्याचे सुरक्षित साधन" (Brick Lifting Tool) या नाविन्यपूर्ण मॉडेलची राज्यस्तरीय स्पर्धेसाठी निवड झाली करण्यात आली आहे. 'इन्स्पायर मानक अवॉर्ड' हा भारत सरकारच्या विज्ञान आणि तंत्रज्ञान मंत्रालयाच्या (Ministry of Science & Technology) विज्ञान आणि तंत्रज्ञान विभागाचा (Department of Science & Technology) एक प्रतिष्ठित कार्यक्रम असून त्याचा उद्देश देशभरातील शालेय विद्यार्थ्यांमध्ये वैज्ञानिक विचार आणि नवोपक्रमाला प्रोत्साहन देणे  आहे. दरम्यान छत्रपती संभाजीनगर येथे पार पडलेल्या या भव्य प्रदर्शनात छत्रपती संभाजीनगरसह जालना जिल्ह्यांमधून एकूण ११८ मॉडेल्स सादर करण्यात आले होते. यापैकी  केवळ ९ प्रोजेक्ट्सची राज्यस्तरीय प्रदर्शनासाठी निवड करण्यात आली. यात विशेष बाब म्हणजे, जिल्हा परिषद प्रशाला, शिवराई ही छत्रपती संभाजीनगर आणि जालना या दोन्ही जिल्ह्यांमधून राज्यस्तरापर्यंत पोहोचणारी एकमेव जिल्हा परिषद शाळा ठरली आहे. प्रशालेच्या या दैदिप्यमान यशाने शिवराई गावात आणि संपूर्ण शैक्षणिक वर्तुळात उत्साहाचे वातावरण निर्माण झाले असून, सर्व स्तरातून या यशासाठी भरभरून अभिनंदन होत आहे. या भव्य जिल्हास्तरीय कार्यक्रमाचे उद्घाटन  जिल्हाधिकारी  दिलीप स्वामी यांच्या हस्ते करण्यात होते. यशिवाय माध्यमिक विभागाच्या शिक्षणाधिकारी अश्विनी लाठकर यांनी कार्यक्रमाचे अध्यक्षस्थान भूषवले होते. त्यांच्या मार्गदर्शनाखालीच हा विज्ञान महोत्सव यशस्वीरित्या पार पडला. समारोपीय कार्यक्रमाचे अध्यक्षस्थानी वेतन व भविष्य निर्वाह निधी पथकाचे अधिक्षक राजू नेब यांनी भूषवले तर प्राचार्या डॉ. सुनिता बाजपाई, उपशिक्षणाधिकारी सिताराम पवार, सीमा मेहत्रे आणि जिल्हा विज्ञान पर्यवेक्षक दिलीप शिरसाठ यांच्यासह अनेक मान्यवरांनी हजेरी लावली.

"विटा उचलण्याचे सुरक्षित साधन" या मॉडेलची संकल्पना आणि यशस्वी प्रवास.....

हे मॉडेल भौतिकशास्त्रातील 'तरफ' (Lever) या साध्या संकल्पनेचा वापर करून बनवण्यात आले आहे. या साधनाच्या मदतीने बांधकाम साइटवरील कामगार एकाच वेळी दोन्ही हातात १० विटा सहज आणि सुरक्षितपणे उचलून नेऊ शकतात. यामुळे कामगारांचे श्रम वाचतात आणि त्यांची कार्यक्षमता वाढते.

हे मॉडेल पार्थ साहेबराव गायकवाड (इयत्ता १० वी) याने सादर केले. त्याला प्रमुख मार्गदर्शक राहुल कळंके व  संदीप तुंबारे  या शिक्षकांचे मार्गदर्शन आणि प्रेरणा लाभली. मुख्याध्यापक ई. बी. गवळी,  शालेय व्यवस्थापन समितीचे अध्यक्ष रामेश्वर आदमने, उपाध्यक्ष रविंद्र त्रिभुवन यांचे या यशामागे अनमोल सहकार्य लाभले. राज्याच्या सर्वोच्च विज्ञान प्रदर्शनासाठी निवड मिळवणे आणि दोन्ही जिल्ह्यांमधून एकमेव जिल्हा परिषद शाळा म्हणून गौरव प्राप्त करणे ही प्रशालेसाठी आणि विद्यार्थ्यांसाठी अत्यंत अभिमानाची बाब मानल्या जात आहे. हे यश ग्रामीण भागातील विद्यार्थ्यांमध्ये असलेल्या सुप्त वैज्ञानिक प्रतिभेला उजाळा देणारे ठरले.

प्रशालेचे मुख्याध्यापक ई. बी. गवळी यांनी पार्थ गायकवाड, मार्गदर्शक शिक्षक आणि या प्रकल्पाशी संबंधित सर्वांचे मनःपूर्वक अभिनंदन केले आहे. या यशाबद्दल पंचायत समिती वैजापूरचे गटशिक्षणाधिकारी  हेमंत उशीर  आणि शिक्षण विस्तार अधिकारी पुदाट यांनी देखील पार्थचे व मार्गदर्शक शिक्षकांचे अभिनंदन केले.  तालुक्यातील व जिल्ह्यातील विज्ञान शिक्षकांनीही पार्थचे तसेच मार्गदर्शक शिक्षक राहुल कळंके व  संदीप तुंबारे यांचे भरभरून कौतुक केले आहे. प्रशालेतील समस्त शिक्षकवृंद आर. झेड. परदेशी,  आर. एस. पगारे,  एस. के. तुंबारे,  एस. एन. बलीकोंडवार, जी. बी. गायके,  पी. ए. कळसकर, एस. टी. भुजाडे, बी. टी. वानखडे, राहुल कळंके,  वाय. डी. जेजुरकर, बी. ए. मुठे,  बी. आर. पवार, आर. ए. कसबे यांनीही या यशात आपला वाटा उचलला. राज्यस्तरावरही हे मॉडेल उत्कृष्ट कामगिरी करेल असा विश्वास त्यांनी व्यक्त केला.